Susmaezinak (Itxaro Borda)

Susmaezinak (Itxaro Borda)

2019/12/1 | Liburu gomendioak

Liburu batzuk irakurtzen ditugunean, zapore mingotsa uzten digute gorputzean. Sail horretan kokatu beharko genuke nobela hau. Historia basatia, gordina, ankerra da.

Iparraldeko militanteekin osatutako komando ibiltariaren bizitza kontatzen digu Itxaro Bordak. Bizi modu arrunta daramaten pertsonak dira, sozialismoak eta Euskal Herria independiente baten ametsak eraman ditu armak hartzera. Ekintza militarrak eta hauek ekartzen dituzten ondorio latzak, hilak, elbarrituak, biktimak eta sufrimendua. Biktima batek bere buruari galdetzen dio “Zergatik gorrotatzen gaituzte?”.

Itxaro Bordak dio literaturak ez duela ezer konpontzen. Agian balioko du gure iragan hurbila hobeki ulertzeko?

Hemen eskuragai.

Iruñea Baiona Maiatzaldia 2017

Iruñea Baiona Maiatzaldia 2017

2017/05/2 | Berriak, Maiatzaldia

Maiatz 2017

Hitzaldiak, umore saioak, liburu aurkezpenak, errezitaldiak, mahai inguruak.

Iruñeko eta Baionako hainbat lekutan izango dira ekitaldiak. Iruñean:  Karrikiri Euskaltzaleen Topagunean, Zaldiko Maldikon eta Kondestablearen Jauregian. Baionan: Euskal Museoan eta Zizpa Gaztetxean.

Iruñea eta Baiona arteko kultur harremanak sendotuak datoz aurtengoan. II. Maiatzaldi honetarako lagun, adiskide eta elkarte gehiago batu zaizkigu. Iruñea eta Baionaren arteko harremanak sakontzen eta zabaltzen joan nahi dugu, Maialen Lujanbiok esango lukeen bezala euskaratik eta euskaraz.

Bi hiri hauen arteko kultur sorkuntzaren eskaparatea izan nahi du Maiatzaldiak. Hitzaldiak, liburu aurkezpenak, mahai inguruak, irakurketa literarioak, umore saioa eta errezitaldiak antolatu ditugu.

Iazko Maiatzaldiak hasiera eman zion mugaz gaindiko harreman honi eta aurtengoa zabalagoa, beteagoa eta anitzagoa izanen dugu, historia, literatura, poesia eta sorkuntzari protagonismoa emanez.

Antolatzaileak gara: Iruñeko Karrikiri Elkartea eta Zaldiko Maldiko Elkartea; Baionako Maiatz Argitaletxea eta Zizpa Gaztetxea eta Senpereko Hatsa Elkartea.

Babesle ditugu: Iruñeko Udala, Nafarroako Gobernua, Eusko Jaurlaritza eta Euskal Elkargoa.

Informazio osoa jasotzeko egin klik hurrengo loturan: MAIATZ2017