Eboluzioa (Zaratamakers)

2018/04/1 | Musika gomendioak

Txuma Flamarike gitarrajolearen azken proiektua da Zaratamakers izenekoa. Rock amerikarraren iturritik edandakoa da eta eragin hori erraz nabari da Atarrabiakoaren azken abenturan. «Eboluzioa» izeneko lan berria osatzeko hiru lagun bildu ditu ondoan; Iker Bengoetxea kantaria, Jon Uribeetxeberria bateria eta Oscar Muñoz baxua.

Hamaika kantuz osatzen da lana. Hitzak, Bengoetxeak sortuak dira eta konposizioak berriz Flamarikek eginak dira. Melodia sarkorrak eta rock & rollaren esentzia mantentzen duten doinuak dira nagusi Zaratamakers taldearen estreinako lanean.

Blues doinuek ere badute beren tokia, «Aurrezblues» izeneko kantua sorpresa bikaina da, Iker Bengoetxea kantariak abilezia berezia erakutsi baitu interpretazio lanean.

Elkar ekoiztetxeak argitaratutako eta babestutako CDa da.

Neska bat leku inposiblean (Xabier Amuriza)

Neska bat leku inposiblean (Xabier Amuriza)

2018/04/1 | Liburu gomendioak

Xabier Amuriza bertsolaria, poeta, itzultzailea, euskaltzale amorratua, saiakera egilea eta oraingo honetan eleberri idazlea da. Francoren garaian, Zamorako kartzelan ehunka preso sozialekin batera, Euskal Herriko apaiz antifrankista talde bat kartzelatuta zegoen.

Preso orok ametsa du kartzelatik ihes egitea eta euskal presoek ere amets berbera zuten. Askatasunaren bila, 1970ean tunel bat egiteari ekin zioten, lan horretan Xabierrek berak ere parte hartu zuen, alde horretatik nobelak badu kutsu auto-grafikoa, baina liburuan kutsu fantastiko bat ere aurkituko dugu.

Posible ote da gizonentzako kartzela batean neska bat agertzea eta iheslariei laguntzea? Ba… liburua irakurri eta zalantza argituko zaizu. Disfrutatu liburu honekin, merezi du eta.

Hemen eskuragai.

Bas(h)oan (Beñat achiary)

Bas(h)oan (Beñat achiary)

2018/02/1 | Musika gomendioak

Bas(h)oan proiektua, Robvie Basho gitarrajolearen lanean oinarritua dago. Musikari Amerikarraren kantuek lilluraturik elkartu dira Beñat Achiary, Joseba Irazoki eta Julen Achiary. Folk eta Rock doinuetatik aratago doazen erritmoak izan dituzte inspirazio iturri.

Itxaro Borda idazlea ere bidelagun izan dute abentura honetan, berak itzuli bait ditu Bashoren jatorrizko zenbait olerki. Idazleak sortutako poemak ere badira lan berrian. Uztarketa honek, aro ezberdinetako gizon eta emakumeen arteko elkarrizketak izatea lortu du achiaryren esanetan.

Ondutako musikariak dira hirurak, etengabeko bilaketan ari diren sortzaileak ditugu. Herri tradizioan edo eta ikuspegi unibertsalagoan murgiltzeko batere arazorik ez duten egileak.

Elkar ekoiztetxeak argitaratutako lana izan da.

Hemen eskuragai.

Nora goaz euskalduntasun honekin? (Joxe Manuel Odriozola)

Nora goaz euskalduntasun honekin? (Joxe Manuel Odriozola)

2018/02/1 | Liburu gomendioak

Denok dakigu Joxe Manuel Odriozola euskaltzale amorratua dela, bizitza osoa eskaini baitio euskararekin harremanik duen gai orori.

Bere ustez euskalduntasun etniko batean jarraitzen dugu bizitzen, ez dugu jauzi egin euskalduntasun nazional politiko batera eta horrek kolokan jartzen du euskararen etorkizuna.

Euskarak ba al du bizirik hegemoniarik gabe? Elebitasunak, kultu-bitasunak ez gaitu eramaten egoera diglosiko batera? Gure gizartean euskarak dituen mugek ez dute euskararen biziraupena bera zalantzan jartzen? Galdera potoloak, zilegi diren zalantzak, euskaldunok buruan izan beharko genituzkeenak.

Liburu bat hausnartzeko eta gure euskararekiko maitasuna elikatzeko.

Hemen eskuragai.

Mendi-joak (Aingeru Epaltza)

Mendi-joak (Aingeru Epaltza)

2018/01/1 | Liburu gomendioak

Euskal Herrian mendizaletasunak erro sakonak garatu ditu. Oso ohikoa izan da mendira joatea, bakeaz eta lagunen presentziaz gozatzeko.

Askorentzako mendia zintzotasunaren sinonimoa izan da, baina beti horrela izan al da? Aingeru Epaltzak erakusten digu ezetz; askotan mendi giroan gure alde ezkutua, iluna azaltzen da, eta gizaki hutsak garela gogoarazten digu. Aingeru Epaltzak mendia mihise bezala erabili du zer motako pertsonak garen erakusteko.

Aitortu behar zaio, alde batetik mendizaletasunaren giroa biziki ongi ezagutzen duela eta, beste aldetik, idazle ofizioa goiti behera menperatzen duela. Historia guztiak trebeki harilkatuta daude, eta bukaerak oso ongi asmatuak. Liburu bikaina eta pasarte batzuetan dibertigarria ere.

Hemen eskuragai.