2018/05/7 | Berriak, Maiatzaldia
Bihar emanen diogu hasiera 2018ko Maiatzaldiari. Mattin Bachok BAM! dinamikaz hitz eginen du, Karrikirin.
Zer da BAM? Baiona, Angelu eta Miarritzen gauzatutako dinamika da eta aste oso batez euskaraz bizitzeko desafioa da BAM! Mattin Bachok, arratsaldeko 19:30ean, Karrikirin, Ipal Euskal Herriko hiri eremu zailenean hiztunak aktibatzeko esperientzia azalduko digu.
Maiatzaldiaren lehendabiziko hitzaldi Euskaraldiarekin bat egiten du, eta bide batez, Iruñean eginen den herri batzordeen prestakutzara gonbidatzen zaitugu! Larunbatean, maiatzaren 12an, 10:30etatik 13:00etara Euskaraldiaren inguruan mintegia izanen da, Katakraken.
Izena emateko sartu hemen.
2018/05/3 | Berriak, Maiatzaldia
Maiatzaren 8tik 24ra, 2018ko Maiatzaldia Iruñea eta Baiona artean eginen da
Iruñea-Baiona, Baiona-Iruñea, ardatz eta zubi. Oinarri nagusietarik bat gure menturan. Iruñea, euskaldunen Erresumako hiriburua, Baiona, portu nagusietarikoa. Aspaldidanikoa da bi hirien arteko harremana, lotura. Hala ere, sasiak janik dago bidea, zubi anitz eraitsiak; ekaitzek eragindako ahanzturak hartaratuak.
Antidotoak behar, beraz, ahanzturaren aitzi. Horiek hola, funtsean Baionako Maiatz elkarte-argitaletxearen eraginez, Iruñeko beste zenbait elkarteren laguntzarekin, bi hirien arteko literatur zubia izan nahi duten Maiatzaldia jardunaldiak abiarazi ziren 2015ean.
Egun pare bat Baionan eta beste bat Iruñean, maiatzean beti ere. Biltzen gaituen bi hirien arteko jardunaldi hauek ildo horietan sortu eta garatu dira, literatur-bideetan barna. Eta, jakina da, literaturak errealitatea du sortzen.
Aurtengo Maiatzaldia duela mende bateko egoeratik abiatuta garatuko da: Gerla Handiaren amaiera, galera eta odol-huste fisiko eta mentala, eta, era berean, gertatutako kultur eta sozial pizkundea (Euskaltzaleen Biltzarra, Eusko Ikaskuntza, Euskaltzaindia…). Egoera eta gertakizun haiek gogoan, atzoko eta gaurko literatur emariak izanen dira ardatz.
Hona Iruñeko egitaraua (atxikirik egitarau osoa eta kartela):
– Maiatzaren 8an, 19:30ean, Karrikirin: “BAM! Dinamika: Hiztunak aktibatzeko esperientzia bat Ipar Euskal Herriko hiri eremu zailenean” Mattin Bachorekin
– Maiatzaren 15ean, 19:30ean, Karrikirin: “Lurraldia eta herria: “Zazpiak bat” Atzo, gaur, bihar” liburuaren aurkezpena Eneko Bidegainen eskutik.
– Maiatzaren 17an, 20:00etan, Zaldiko Maldikon: Seitan taldearen kontzertua
– Maiatzaren 24an, Iruñeko Kondestable Jauregian:
18:30: 1914-1918 Oroituz 1914ko Gerlan bidalitako gutun eta postalen diaporama bat. Jean Larrue Milafrangarrak etxekoei bidalitakoak. Lucien Etxezaharretaren eskutik
19:15: Gerla garaiko bertsoakL. Hariñordoki- Lakarekin
19:45: Nafarroa mende hasieran Emilio Majuelorekin
20:15: Lurraldetasun zauritua Eneko Bidegainen eskutik
20:50: bukaera
2017/06/1 | Berriak, Maiatzaldia
Egutegiak ez dio gezurrik, eta hilabete honetako orrialdean argi irakurri dugu: Ekaina. Maiatza joan zaigu, beraz. Eta amaitu zaigu Maiatzaldia hortaz.
Egitarau oparo eta zabala izan da aurtengoa. Izena bera txiki geratzen hasi zaigu. Ez baita Iruñea eta Baionaren arteko harremana bakarrik. Zerbait gehiago ere bada. Eta zerbait gehiago ere izanen da. Mugak zartatzeko, hari berriak sortzeko eta han eta hemen (zer da han? Zer da hemen?) euskaldunak konspiratzen jartzeko balio izan du honek guztiak.
Emaitzarekin oso kontent gaude eta aurrera jarraituko dugu. Ideiak eta asmoak baditugu (batzuk xumeak, besteak handiak), baina bidean batzeko prest dagoen ororen ideien eta gogoen berri izan nahi dugu. Nahi baduzu, jarri gurekin harremanetan eta elkarrekin jarraituko dugu herria hau euskaratik eta euskaraz sortzen.
Mila esker parte hartu duzuen guztioi!!
2017/05/29 | Maiatzaldia
Iruñea Baiona Maiatzaldiari bukaera borobila emateko Aines Dufaur, IKAS argitaletxeko zuzendariak “Haur literatura, hizkuntza eta heziketa” hitzaldia eskainiko du. Hitzordua, maiatzaren 31n, Karrikiri Elkartean, arratsaldeko 19:00etan da.
IKAS euskal pedagogia zerbitzuak ikastresnak sortzen edo euskaratzen ditu, haur hezkuntzatik helduen irakaskuntzaraino, gai asko hukituz: hizkuntza, matematika, historia-geografia, zientziak…
Ikastetxeetan bereziki idazketa eta irakurketa lantzeko, IKASek haur literaturako albumak euskaratzen ditu edota obrak sortzen, adibidez Haserre gorria, Pello eta otsoa, Dutea trilogia… IKAS mediateka ere bada, eta irakasleei zuzenduriko animazioak antolatzen ditu.
Aines Dufaur, zuzendaria, IKASeko lanaz, haur literaturaz, hizkuntzaz eta heziketaz arituko zaigu heldu den astean.
Honekin itxiko dugu 2017ko Maiatzaldia; 8 ekitaldiz osatutako egitaraua eskaini dugu aurten (hitzaldiak, liburu aurkezpenak, bisita gidatuak, mahai inguruak, irakurketa literarioak, umore saioa eta errezitaldiak). Maiatzaldiaren helburua Iruñea eta Baionaren arteko kultur sorkuntzaren erakusleihoa izatea eta bi hirien arteko kultur harremanak sendotzea izan da.
Hitzaldia: “Haur literatura, hizkuntza eta heziketa”
Hizlaria: Aines Dufaur, IKASeko zuzendaria
Noiz: maiatzaren 31n, arratsaldeko 19:00etan
Non: Karrikiri Elkartea, Xabier karrika 4an
Antolatzaileak: Iruñeko Karrikiri Elkartea eta Zaldiko Maldiko Elkartea; Baionako Maiatz Argitaletxea eta Zizpa Gaztetxea eta Senpereko Hatsa Elkartea.
Babesleak: Iruñeko Udala, Nafarroako Gobernua, Eusko Jaurlaritza eta Euskal Elkargoa.
2017/05/23 | Liburu aurkezpenak, Maiatzaldia
Iruñea Baiona Maiatzaldiarekin jarraitzen dugu, eta bihar arratsaldean, Karrikirin, Mikel Hiribarrenek “Basaburuko altxorrak: Itsasuko laborari baten gogoetak” liburua aurkeztuko digu. Hitzordua arratsaldeko 19:00etan duzu!!
Duela gutxi, berarekin solasean egon ginen eta horrela laburtu zigun liburuaren edukia: Basaburuko altxorrak, Basaburuko Saskiko berripaperean zazpi urtez agertu diren kronikak daude bildurik Basaburuko altxorrak liburuan.
Saskiko bezeroentzat idatzia izanak dira, baserritik hiritarrentzat beraz. Eta asmatuak izan diren kronologia berean agertzen dira liburuan.
Kronika guziek badute zerbait lotura gure nekazari auzoko bizitzarekin, Basaburuko bizitzaren lekuko eta oihartzun dira.
Jakitateak badira bi modutakoak munduan. Bata jakitate hotza, ikerlari, unibersitate eta jakintsun jauntziena. Bestea jakitate beroa, jendartearen bizitzatik eta esperientziatik eskuratzen dena, behar den bezala begirale egonez geroz. Jakitate beroa gureganatzea izan da beti gure asmoa, hainbeste baitzaukaten gure ama, aita edo aitonek. Eta gure amentsa, amentsik bagenu, bizitzaren lekukoa mezu sendoz beterik uztea edo ematea etorkizuna eraikitzeko altxatzen ari diren gazte guziei.
Mikel Hiribarrenen biografia: “Gure familia duela mende bat kokatu zen etxaldean sortua naiz 1956 an. Lapurdi Itsasuko Aroztegia baserrian, hain zuzen Basaburu deitzen den auzogune batean. Gaztetandik euskarazko artikuluak idazten aritua, Zeruko Argiako berri emaile lehenik Iparraldetik 1980a aintzinetik, eta ondotik Herriz Herri iparraldeko astekarian edo aspalditik ELB nekazari sindikataren Laborari astekarian kronika idazle. Militantzia gehiena nekazari sindikatari ematen diot, eta azken lau urtetan nago ELBren ordezkari confédération Paysanneko mahain nazionalean Parise aldean. Lanbide bakarra daukat bizitzan egunerokoa irabazteko, sortu ninduen etxaldean nekazari, beste bi lagunekin…. eta 1998az geroztik, Basaburuko hiru etxaldekin, Saskiaren sortzaile eta banatzaile. Basaburuko Saskiaren bezeroei hamabostero zuzentzen diegu argibide orri bat, aukeraz dauden ekoizpenekin, sukaldeko errezeta batekin, eta frantsesez eta euskaraz asmatzen ditugun berri artikulu xume batzuekin. Euskarazko kronika hoik dira agertzen Maiatz ek agertu berri duen liburuan: “Basaburuko altxorrak”, Itsasuko laborari baten gogoetak.”
Honatx, Sustrai Colinak Argiarako egin zion elkarrizketa.
2017/05/15 | Berriak, Maiatzaldia
Asisko Urmenetak eta Peio Etxekoparrek “Beste aldekoak” umore saioa eskainiko dute Zaldiko maldiko elkartean, maiatzaren 19an, ostiralarekin, 19.30ean.
Peio Etxekopar (Lexantzü, Zuberoa) eta Asisko Urmeneta (Iruñea, Nafarroa), bakoitza bere esperientziatik, euskalduntasunaz ariko zaizkigu. Haiek azaldu bezala, “Hain ezberdinak diren bi mundu (Frantzia-Espainia, Ipar-Hego, Hiri-Herri), zerk ditu bildu gaualdi honetan ? Eta ba ote da balizko loturarik oraino, bertaratuko den jendearekin? Duda metodikoa eta umorea lagun, denok ikasiko dugu zerbait elkarren artean. Edo ez”.
Sarrera libre izango da, aforoa bete arte.
Bestetik, maiatzaren 17an eta 18an, Baionan jarraituko du Maiatzaldiak. 17an liburu aurkezpena eta mahai inguruarekin eta 18an, irakurketa literarioa, liburu aurkezpena eta bideo emanaldiarekin.
