“Munstroek ere pixa egiten dute ohean” izenburuarekin Pello Añorgak (testua) eta Jokin Mitxelenak (irudiak) 2015eko Etxepare saria eskuratu dute.
Tamaina handiko liburu honen bidez, “Piztiak bizi diren lekuan” liburuari keinu egiten diote. 
Gehiago jakin nahi baduzu, hementxe sipnosia: MUNSTROEK PIXA EGITEN DUTE OHEAN liburuak keinu bat egiten dio beste liburu bati: Maurice Sendak-enPiztiak bizi diren lekuan delakoari. Liburua 1963an argitaratu zen eta hasieran galarazia egon arren, agudo, bere lekua aurkitu zuen haur literaturaren korronte psikologikoaren barruan. Spike Jonze-k ere, berriki, 2009an, filma bat eskaini zion.
Album honetan, aipatutako album hartan ez bezala, neska bat da protagonista nagusia, eta gustatuko zaio munstroen lurraldera joatea, eta, munstroak lagun, munstrokeriak egitea, helduen mundua trasgrediturik. Dena den, Sendak-en liburuan ez bezala, munstroen lurraldea agertuko da hemen ez leku dibertigarri gisa bakarrik, baita amets gaiztoen leku ikaragarri modura ere. Munstroek eta haurrek ohe berean lo egiten dute eta, hortaz, ez da harritzekoa, haiek ere haurrak bezain beldurtiak izatea. Noski, Valentina neskato ausartak laguntza eskainiko die munstroei eta, azkenean, puzten eta puzten doan beldurra, barre algara eta lasaitasun bihurtuko da.
Irudia: Pamiela Argitaletxea