Izan ere urtero gisa, plangintzaz solasteko aukera izan baikenuen Zaldiko Maldikora bertaratu ziren bazkideekin batera, baita euren ekarpenak jaso ere. Beraz urteko plangintza horrekin lanari ekinen diogu markatutako lan ildoi jarraikiz.
Eta plangintzarekin batera, Eguberriak ia bertan ditugula ikusirik, Karrikiri dendan dena prest dugu Olentzerori ongi etorria egiteko eta hori dela eta, aurtengoan Olentzeroren III Karrikaratzea ospatuko dugu, Txantreatik gure dendan izaten den Olentzero panpina dendara ekarriz. Aurreko bi edizioen moduan, kalejira polit bat eginen dugu Dugunako txistularien laguntzaz eta alde zaharreko karriketan barna ibili ondoren, otamentxoa eginen dugu Karrikiri dendan. Beraz, animatu zaitezte.
Eta ekimen horiekin batera, abenduko Karrikan bestelako eduki interesgarriak aurkituko dituzue: Iruñean azaroaren 30ean eginen den “Euskarak 365 egun” kanpainaren aurkezpena eta manifestua, Silbia Alonso Karrikiri dendako arduradunari Gabonak direla eta eginiko elkarrizketa, euskarazko ekitaldiak biltzen dituen abenduko agenda oparoa eta Karrikiri dendan aurkituko dituzuen Durangoko Azokan aurkeztuko diren liburu eta disken eskaintza.
Eta abenduko Karrikarekin batera, gabonetako katalogoa ere banatuko dugu, beraz eskuratzerik ez baduzu, pasa zaitezte Xabier karrikako gure bulego-dendatik.
Eguberri on guztioi eta, dendan edo bulegoan elkar ikusten ez badugu, urte berri on!!
