Goizian argi hastian kanta ederra abestu genuen abenduaren 20ko goizean. Iruñeko hilerriko atarian bildu ginen Aitor Etxarteri azken agurra emateko.
Kolpe latza izan da, biziki hunkitu gaitu haren galerak. Bereziki animoak eman nahi dizkiogu Aitorren sendiari. Hurbileko lagunak ditugu eta momentu zail hauetan besarkadarik estuena bidali nahi diegu.
Aitorrek asko maite zuen Karrikiriren proiektua. Haren ideiak, ezagutzak eta eskuak prest zituen beti laguntzeko eta gure ametsei bultzada emateko. Gainera, aktiboki ari zen parte hartzen: urriaren 3an urteko Batzar Orokorrean hartu zuen parte, urriaren 18an azaroko Karrikarako artikulua proposatu zuen… eta urriaren 30ean ZIUn oso larri zegoela jakin genuen…
Oso azkar joan da dena. Bat-batean. Lagun ordezkaezina ostu digute.
Orain, zu gabe jarraituko dugu aurrera. Mila esker eta beti arte, Aitor.
